Bunyag sa Bata: Nganong Bunyagan Ang Bata?

Pagtulon-an mahitungod sa bunyag sa bata! Karon atong pagahisgutan ang mahitungod sa bunyag, kung nganong bunyagan ang bata? Atong hinumduman nga si Kristo Jesus gibunyagan usab, apan dako na kini nga gibunyagan ni Juan magbubunyag. Mao kini ang katarungan ngano nga ang uban nahisalaag sa tinuod nga tinuohan. Duna silay mga pangutana nga ato karong tubagon niining maong panid.

Ang unang pangutana; nganong bunyagan ang bata?

Ug ang tubag mao kini; aron maapil sa kaluwasan. Kay matud pa sa Marcos 16:16 ang tawo maluwas kon kini motuo ug magpabunyag. Busa kinahanglan gayod nga iapil nato ang bata sa pagpangluwas (Buhat 2:39), kay ang bunyag mao may usa ka paagi sa kaluwasan nga gitudlo ni Kristo Jesus. Labot pa, kinahanglan mahisakop ang bata sa lawas ni Kristo, kay diha sa bunyag mahiusa man kita ni Kristo Galacia 3:27 ug Roma 6:3, ug diha sa pagkahiusa kaniya, usa kini kapaagi nga mahimo kitang mga anak sa Dios (1 Corinto 8:16-17). Oh di ba, daghan kaayo ang rason mga higala kung nganong bunyagan ang bata. Ug timan-i kini; wala gayod kini gidili sa bibliya, ang pagbunyag sa mga bata.

Ang ikaduhang pangutana; nganong buboan man ang bunyag sa katoliko nga tuslob man ang paagi ni Juan magbubunyag?

Tubag: Ang pulong “Bunyag” nagagikan kana sa pinulongang Griego nga “Baptizern” ug sa Latin nga “Baptizare” nga pulos nagkahulogan ug paghugas kon paglinis pinaagi sa pagbubo (Aspersion) kun pagtunlob sa tubig (Immersion) (cf. Conway, The Question Box, p.239). Ug angay natong hibaloan nga ang bunyag ni Juan mao ang bunyag sa paghugas lamang sa sala pinaagi sa tubig, apan ang gasa sa Dios mao ang bunyag pinaagi sa Espiritu Santo (Buhat 1:5).

Mao kana ang mga tubag sa pangutana nga; nganong bunyagan ang bata sa Katoliko ug unsa ang paagi sa bunyag? Kon aduna kamoy dugang pang mga pangutana, pagkomentaryo lang mo sa ubos niining maong pagpahayag aron atong idugang niining maong diskusyon. Hinaot nga nasabtan.

Read more: 10 commandments bisaya