Unsa ang Adlaw nga Igpapahulay Sabado o Dominggo?

Usa sa kalihukan sa mga relihiyosong grupo, mao ang adlaw nga igpapahulay (Sabbath) nga matod pa sugo sa Dios alang sa tanang tawo. Ato kini karong utingkayon kung unsa man gayod ang tinood nga pagtulon-an mahitungod sa adlawng igpapahulay o Sabbath day. Kinahanglan magbasi kita sa bibliya o balaang kasulatan para mamatud-an ang pagtulon-an mahitungod sa adlaw nga igpapahulay.

Kinahanglan ba gayod nga sundon sa tanang tawo ang adlawng igpapahulay? Ato kining basahon kining partiha sa kasulatan nga mabasa sa sulat sa Exodo 20:9-10, nga matud pa, makatrabaho kamo sa unom ka adlaw apan sa ikapito mao ang adlaw nga igpapahulay (Sabbath day), kinahanglan balaanon ninyo kini.

Ang pangutana, kinsa man ang gisugo sa Dios niana? Kung atong basahon sa sinugdan sa maong kapitulo, Exodo 20:1 atong mamatod-an nga kini us aka kasabutan tali sa Dios ug sa mga taga Israel, kay naghisgot man kini mahitungod sa pagluwas sa Dios kanila sa dihang nabihag sila sa kamot sa mga Ehiptohanon. Dugang pang pagmatuod mao ang mabasa nato sa Deuteronomio 5:12-15 nga naghisgot gihapon kini sa pagtamod sa adlawng igpapahulay, ug ang iyang gisugo mao ang mga taga Israel. Nganong ikapito man? Tungod kay mao kanang adlawa diin sila giluwas sa Ginoo gikan sa kamot sa mga Ehiptohanon.

Natuman ba kini sa mga taga Israel? Wala kini matuman matod pa sa Amos 8:5, Ezequiel 20:13, busa gitagna nga pahunongon na kini matod pa sa Oseas 2:11 apil ang mga pangilin. Apan bisan pa nga gipahunong na ang sabado, magpadayon gihapon ang adlawng igpapahulay pero sa lain na nga adlaw, Hebreo 4:8-9. Ug unsa man kining adlawa? Kining adlawa mao ang dominggo kay gipahaom man kini sa pagkabanhaw ni Kristo, Mateo 28:1

Nagtudlo ba si Kristo sa pagpadayon sa adlaw nga igpapahulay? Wala, ngani nangutlo og uhay ang iyang mga tinun-an sa adlaw nga sabado pero wala niya pakasad-a Mateo 12:1-5. Ang bakol usab gipapas-an ni Kristo og banig (Juan 5:9) nga supak man kini sa Sabbath o adlaw nga igpapahulay (Jeremias 17:21).

Mao nga klaro kayo nga ang adlaw nga igpapahulay sa mga Kristiyano mao gayod ang adlaw nga dominggo. Hinaot pa unya nga nasabtan sa mga nagbasa niining maong pagtulon-an. God bless!

Dugang pagbasa: 10 commandments bisaya