Dios ba si Jesus nga mao ang Kristo?

Sa tinuod, wala gayoy diretso nga sulti sa atong Ginoo nga si Jesus nga nag-ingon “Dios ako”. Pero adunay daghang mga bersikulo nga nagmatuod nga si Jesus nga Kristo usa gayod ka Dios. Kini nga topiko, usa sa mga gikagubtan sa mga relihiyosong grupo, ang pagkatawo ni Kristo kung Dios ba gayod siya o dili?

Usa sa mga sekta nga nagmatuod nga dili Dios si Kristo Jesus, mao ang relihiyon nga nag-ulohan og “Iglesia ni Cristo” sa Pilipinas nga tinukod ni Mr. Felix Y. Manalo. Tinuod kaha ang ilang pagmatuod? Unsay ebidensiya nga ilang ikapakita?

Kung hisgutan na gani kining maong topiko, mokutlo dayon sila sa Juan 17:3 nga matud pa, ang Amahan mao ang tinuod nga Dios, ug si Jesus nga Kristo sinugo lamang sa Dios. Pero ang kasulatan wala mag-ingon nga si Kristo sinugo “lamang”, ngani dili nato malalis nga daghang mga bersikulo nga nagmatuod nga siya mao ang Anak sa Dios, siya mao ang Mesiyas, siya tawo ug uban pa. Pero wala gayod niya lituka ang pulong “lamang”. Ug kanang maong kamatuoran wala nato kana supaka kay anaa man kana sa bibliya. Pero ayaw usab supaka kung ang bibliya magapamatuod usab nga si Jesus nga Kristo usa gayod ka Dios.

Mga pamatuod nga si Kristo Jesus usa gayod ka Dios.

Sa basahon ni San Juan 1:1 nagapamatuod nga ang Pulong usa ka Dios, ug giklaro pa gayod kini sa bersikulo 2 nga Dios gayod ang pulong nga mao ang kauban sa Dios. Ug atong mabasa sa Juan 1:14 nga ang pulong nagpakatawo, mao nga nahimo gayod siyang tinuod nga tawo kay gamhanan man ang Dios ug mahimo gayod niya ang tanan. Ang pulong nga matod pa Dios, pagatawgon kini og Anak sa Dios. Kinsa man kining Pulong nga Dios nagpakatawo ug tawgon nga anak sa Dios? Walay lain mga kaigsoonan, siya mao si Jesus Kristo nga manluluwas. Mao nga dinhi pa lamang nga parte sa kasulatan, dili na kadudahan nga si Jesucristo usa gayod ka Dios.

Dugang pa nga kamatuoran nga Dios si Kristo mao ang nahasulat sa 2 Pedro 1:1, nga gipamatud-an ni San Pedro nga si Jesucristo mao ang Dios ug manluluwas.

Dugang pa sa sulat sa Pinadayan 19:10, nagmatuod kini nga ang Dios maoy simbahon ug dili ang sulogoon. Mao nga klaro kaayo nga Dios si Kristo tungod kay gisimba siya sa makadaghan, apan wala niya sila badlonga, busa ang kasulatan nagapamatuod gayod nga Dios si Kristo.

Mga reperensiya nga gisimba si Jesucristo: (Mateo 2:11; 14:33; 28:9,17; Lucas 24:52; Juan 9:38)

Ug sa Tito 2:13 naghisgot sa atong pagpaabot sa atong Dios ug manluluwas nga mao si Jesuscristo.

Si Tomas mismo miingon ni Jesucristo nga "Ginoo ko ug Dios ko" Juan 20:28.

Duna ba kamoy ikadugang niining maong pagtulon-an? Pagbilin lang mo og komentaryo sa ubos niining panid.

Related: Kinabuhi ni Jesus